KASİDE DER NA' T-I HAZRET-İ NEBEVÎ
1. Saçma ey göz eşkden gönlümdeki odlâre su
Kim bu denlü dutuşan adlare kılmaz çare su
2. Âb-gûndur günbed-i devvâr rengi belmezem
Ya muhit olmuş gözümden günbed-i devvâre su
3. Zevk-i tîgından aceb yoh olsa gönlüm çâk çâk
Kim mürûr ile brakur rahneler dîvâre su
4. Vehm ilen söyler dil-i mecrûh peykânın sözün
İhtiyat ile içer her kimde olsa yâre su
5. Suya versün bağban gülzarı zahmet çekmesün
Bir gül açılmaz yüzün tek verse bin gülzare su
6. Ohşadabilmez gubârını muharrir hattuna
Hâme tek bahmakdan inse gözlerine kâre su
7. Arızun yâdıyla nemn'ak olsa müjganım n'ola
Zâyi olmaz gül temennâsıyla vermek hâre su
8. Gam günü etme dil-i bimardan tigin diriğ
Hayrdur vermek karangu gicede bimâre su
9. İste peykanın gönül hicrinde şevkim sakin et
Susuzam bir kez bu sahrada benimçün âre su
10. Men lebün müştakıyam zühhâd Kevser tâlibi
Nitekim meste mey içmek hoş gelür huşyâre su
11. Ravza-i kûyuna her dem durmayıp eyler güzâr
Âşık olmuş gâliba ol serv-i hoş reftâre su
12. Su yolun ol kûydan toprag olup dutsam gerek
Çün rakibimdir dahi ol kûya koymam vâre su
13. Dest bûsi arzûsuyla ölürsem dostlar
Kûze eylen toprağım sunun ânınla yâre su
14. Serv serkeşlik kılur kumrî niyâzından meğer
Dâmenin tuta ayağına düşe yalvâre su
15. İçmek ister bülbülün kanın meğer bir reng ile
Gül budağının mizâcına gire kurtâre su
16. Tiynet-i pakini ruşen kılmış ehl-i aleme
İktidâ etmiş tarik-i Ahmed-i Muhtâre su
17. Seyyid-i nev-i beşer deryâ-ı durr-i istifa
Kim sebetür mu'cizatı âteş-i eşrare su
18. Kılmak için taze gül-zâr-i nebüvvet revnâkın
Mûcizinden eylemiş izhâr seng-i hâre su
19. Mu'cizi bir bahri bî-pâyan imiş âlemde kim
Yetmiş andan min min âteş-hâne-i küffâre su
20. Hayret ilen barmağın dişler kim etse istimâ'
Barmağından virdügin şiddet günü Ensâr'e su
21. Dostı ger zehr-i mâr içse olur Âb-ı Hayât
Hasmı su içse döner elbette zehr-i mâre su
22. Eylemiş her katreden bin bahr-i rahmet mevc-hîz
El sunup urgaç vuzu-i için gül-i ruhsâre su
23. Hâk-i pâyine yetem der ömrlerdir muttasıl
Başını taştan taşa urup gezer âvâre su
24. Zerre zerre kâk-i der-gâhına ister sala nûr
Dönmez ol der-gâhtan ger olsa pâre pâre su
25. Zikr-i na'tün virdini dermân bilir ehl-i hatâ
Eyle kim def-i humâr için içer mey-hâre su
26. Yâ Habibellah Ya hayre'l beşer meştâkınam
Eyle kim lebneşneler yanıp diler hemvâre su
27. Sensin ol bahr-i kerâmet kim şeb-i Mi'râc'da
Şeb-nem-i feyzin yitirmiş sâbit ü seyyâre su
28. Çeşme-i hur-şidden her dem zülal-i feyz iner
Hâcet olsa merkadin tecdîd eden mîmâre
29. Bîm-i dûzah nâr-i gam salmış dil-i sûzânıma
Var ümîdim ebr-i ihsânın sepe ol nâre su
30. Yümn-i na'tinden güher olmuş Fuzûlî sözleri
Ebr-i nîsandan dönen tek lü'lü-i şeh-vâre su
31. Hâb-ı gafletten olan bîdâr olanda rûz-i haşr
Hâb-ı hasretten dökende dîde-i bîdâre su
32. Umduğum oldur ki Rûz-i Haşr mahrûm olmayam
Çeşme-i vaslın vere ben teşne-i dîdâre su
